កម្លាំងសហការរបស់យោធា បង្ក្រាបបទល្មើសនេសាទបឹង ទន្លេសាប បានចុះបង្ក្រាបរបាំងវែងៗ លើសពីច្បាប់នៃរដ្ឋបាលជលផល ក្នុងភូមិសាស្ត្រស្រុកបរិបូណ៌

កំពង់ឆ្នាំង÷ នៅព្រឹកថ្ងៃទី១២ ខែកញ្ញា​ ឆ្នាំ២០២៦ កងកម្លាំង យោធា បង្ក្រាបបទល្មើសនេសាទ​ តំបន់ប្រតិបត្តិការសឹករងខេត្តកំពង់ឆ្នាំង​ ទិសទី២ ស្រុកបរិបូរណ៌ បានសហការ ជាមួយកងកម្លាំងកងពលតូចលេខ៥១ របស់យោធភូមិភាគ​ទី​៥​ បានចុះប្រតិបត្តិការបង្ក្រាបបទល្មើសនេសាទ ដាក់របាំង ដែលមានប្រវែងវែង លើសពីច្បាប់នៃរដ្ឋបាលជលផល ស្ថិតនៅចំណុចភូមិកំពង់អួរ ឃុំព្រះគគី ស្រុកបរិបូណ៌ ខេត្តកំពង់ឆ្នាំង។

ក្នុងការប្រតិបត្តិការបង្ក្រាបនេះ យោងតាមសមត្ថកិច្ចយោធាបង្ក្រាបបទល្មើសនេសាទ បានឲ្យដឹងថា ដោយកម្លាំងយោធាសហការបានចុះល្បាត ក៏បានប្រទះឃើញ និងបានបង្ក្រាបភ្លាមៗនៅនឹងកន្លែង ដោយក្នុងនោះកម្កាំងសរុបចំនួន១១នាក់ និងប្រើប្រាស់​មធ្យោបាយ​ ទូគបាឡាស្មាច់ចំនួន ០២គ្រឿង ហើយនិងបានធ្វើការកម្ទេចចោល របាំងណរ៉ាវ និងរុះរើ និង​ កាត់បំផ្លាញបានចំនួន ០៥របាំង ស្មើ ២០៥០ ម៉ែត្រ ។

ដោយតាមការបញ្ជាក់ប្រភពខាងលើដដែលបានឲ្យដឹងថារបាំង មួយរបាំង មានប្រវែង ពី៣៥០ម៉ែត្រ ទៅ៦០០ម៉ែត្រ ។

កម្លាំងសហការរបស់យោធាបង្ក្រាបបទល្មើសនេសាទ បានកាប់កម្ទេចចោល នូវបទល្មើសរបាំងណរ៉ាវ មានប្រវែងវិញវែងខាងលើនេះ ធ្វើឡើងតាមបទបញ្ជាយ៉ាងម៉ឺងម៉ាត់ របស់ឯកឧត្តម ឧត្តមសេនីយ៍ទោ សេង ធារិន ប្រធានគណៈបញ្ជា ការបង្ក្រាបបទល្មើសនេសាទ ក្នុងផ្ទៃបឹងទន្លេសាប និងតាមបទបញ្ជារបស់ថ្នាក់លើ៕